ദിവസവും ഗുളിക വേണ്ട… ഗർഭനിരോധനത്തിന് കൈയിൽ ഒരു ചെറിയ ഇംപ്ലാന്റ്! ഇംപ്ലാനോൺ

ഗർഭനിരോധന മാർഗങ്ങളെക്കുറിച്ച് സംസാരിക്കുമ്പോൾ പല സ്ത്രീകളുടെയും പ്രധാന ആശങ്ക ഇതാണ്:

“ദിവസവും ഗുളിക കഴിക്കാൻ മറന്നുപോയാലോ?”

മറ്റു ചിലർക്ക് കോപ്പർ ടി പോലുള്ള ഗർഭാശയത്തിനുള്ളിൽ സ്ഥാപിക്കുന്ന മാർഗങ്ങളോട് താൽപര്യമുണ്ടാകില്ല. എന്നാൽ ദിവസവും ഓർത്തുവയ്ക്കേണ്ടതില്ലാത്തതും, ദീർഘകാലം ഗർഭനിരോധന സംരക്ഷണം നൽകുന്നതുമായ മറ്റൊരു മാർഗമുണ്ട്.

അതാണ് ഗർഭനിരോധന ഇംപ്ലാന്റ് (Contraceptive Implant).

എന്താണ് ഗർഭനിരോധന ഇംപ്ലാന്റ്?

തീപ്പെട്ടിക്കോലിനേക്കാൾ ചെറുതും വളരെ നേർത്തതുമായ ഒരു ചെറിയ റോഡ് പോലെയുള്ള ഉപകരണമാണ് ഇത്.

സ്ത്രീയുടെ മേൽക്കൈയുടെ ഉൾവശത്ത്, ചർമ്മത്തിനടിയിലാണ് ഇത് സ്ഥാപിക്കുന്നത്. പുറത്തുനിന്ന് സാധാരണയായി ശ്രദ്ധയിൽപ്പെടില്ല.

ഇംപ്ലാന്റിൽ പ്രോജസ്റ്റിൻ (Progestin) വിഭാഗത്തിൽപ്പെട്ട ഹോർമോൺ അടങ്ങിയിരിക്കുന്നു. ഇത് വളരെ ചെറിയ അളവിൽ ശരീരത്തിലേക്ക് തുടർച്ചയായി പുറത്തുവിട്ടുകൊണ്ടാണ് ഗർഭധാരണം തടയുന്നത്.

ഒരു പ്രധാന സൗകര്യം എന്താണെന്നാൽ — ഒരിക്കൽ സ്ഥാപിച്ചാൽ ദിവസവും ഗുളിക കഴിക്കണമെന്നോ ഓരോ മാസവും എന്തെങ്കിലും ഓർത്തുവയ്ക്കണമെന്നോ ഇല്ല.

ഇത് എങ്ങനെയാണ് ഗർഭധാരണം തടയുന്നത്?

ഇംപ്ലാന്റിൽനിന്ന് പുറത്തുവരുന്ന ഹോർമോൺ പ്രധാനമായും രണ്ട് രീതിയിലാണ് പ്രവർത്തിക്കുന്നത്.

ഒന്നാമതായി, അണ്ഡവിസർജനം (Ovulation) തടയുന്നു.

രണ്ടാമതായി, ഗർഭാശയമുഖത്തുള്ള സെർവിക്കൽ മ്യൂക്കസ് (Cervical mucus) കട്ടിയാക്കുന്നു. അതുവഴി ബീജാണുക്കൾക്ക് അണ്ഡത്തിലേക്ക് എത്തിച്ചേരുന്നത് കൂടുതൽ പ്രയാസമാകുന്നു.

ഈ രണ്ടു പ്രവർത്തനങ്ങളും ചേർന്നാണ് ഗർഭധാരണത്തിനെതിരെ വളരെ ഉയർന്ന സംരക്ഷണം നൽകുന്നത്.

എത്രത്തോളം ഫലപ്രദമാണ്?

ഗർഭനിരോധന ഇംപ്ലാന്റിന്റെ ഏറ്റവും വലിയ പ്രത്യേകത അതിന്റെ ഉയർന്ന ഫലപ്രാപ്തിയാണ്.

സാധാരണ ഉപയോഗത്തിൽ പോലും ആദ്യ വർഷത്തിൽ 1000 സ്ത്രീകളിൽ ഏകദേശം ഒരാൾക്ക് മാത്രമാണ് ഗർഭധാരണം സംഭവിക്കുന്നത് എന്ന തോതിലാണ് ഇതിന്റെ ഫലപ്രാപ്തി. അതുകൊണ്ടുതന്നെ ലഭ്യമായ ഏറ്റവും ഫലപ്രദമായ തിരിച്ചെടുക്കാവുന്ന ഗർഭനിരോധന മാർഗങ്ങളിൽ ഒന്നായി ഇത് കണക്കാക്കപ്പെടുന്നു.

എത്രകാലം സംരക്ഷണം ലഭിക്കും?

ഈ ലേഖനത്തിൽ പറയുന്ന Etonogestrel contraceptive implant ഉപയോഗിച്ച് മൂന്ന് വർഷം വരെ ഗർഭനിരോധന സംരക്ഷണം ലഭിക്കും.

എന്നാൽ അതിനർത്ഥം മൂന്നു വർഷം നിർബന്ധമായും ഇത് കൈയിൽ സൂക്ഷിക്കണമെന്നല്ല.

ഒരു സ്ത്രീക്ക് ഗർഭധാരണം ആഗ്രഹിക്കുന്നുവെങ്കിൽ, മറ്റൊരു ഗർഭനിരോധന മാർഗത്തിലേക്ക് മാറണമെങ്കിൽ, അല്ലെങ്കിൽ മറ്റേതെങ്കിലും കാരണത്താൽ തുടരാൻ താൽപര്യമില്ലെങ്കിൽ ഡോക്ടറുടെ സഹായത്തോടെ നേരത്തെയും ഇംപ്ലാന്റ് നീക്കം ചെയ്യാം.

ഇംപ്ലാന്റ് ഇടുന്നത് വലിയൊരു പ്രൊസീജറാണോ?

അല്ല.

പരിശീലനം ലഭിച്ച ഡോക്ടർ മേൽക്കൈയിലെ ചെറിയൊരു ഭാഗം ലോക്കൽ അനസ്തീഷ്യ നൽകി മരവിപ്പിച്ച ശേഷം, ചർമ്മത്തിനടിയിൽ ഇംപ്ലാന്റ് സ്ഥാപിക്കുന്നു.

സാധാരണയായി വളരെ കുറച്ച് സമയം മാത്രം വേണ്ടിവരുന്ന ഒരു ചെറിയ പ്രൊസീജറാണിത്.

എന്നാൽ ഇംപ്ലാന്റ് ശരിയായ സ്ഥാനത്ത് സ്ഥാപിക്കുന്നതും പിന്നീട് ആവശ്യമുള്ളപ്പോൾ സുരക്ഷിതമായി നീക്കം ചെയ്യുന്നതും പരിശീലനം ലഭിച്ച ആരോഗ്യപ്രവർത്തകൻ തന്നെ ചെയ്യണം.

പീരിയഡ്സിൽ മാറ്റം വരുമോ?

ഇംപ്ലാന്റ് തിരഞ്ഞെടുക്കുന്നതിന് മുൻപ് സ്ത്രീകൾ അറിഞ്ഞിരിക്കേണ്ട ഏറ്റവും പ്രധാനപ്പെട്ട കാര്യങ്ങളിൽ ഒന്നാണിത്.

മാസമുറയുടെ രീതിയിൽ മാറ്റം വരാം.

ചിലർക്ക് ചെറിയ spotting ഉണ്ടാകാം. ചിലർക്ക് പീരിയഡ്സ് ക്രമരഹിതമാകാം. ചിലർക്ക് രക്തസ്രാവം കുറയാം. മറ്റുചിലർക്ക് കുറച്ചുകാലത്തേക്ക് പീരിയഡ്സ് വരാതിരിക്കാം.

ഈ മാറ്റങ്ങൾ പലപ്പോഴും ആരോഗ്യത്തിന് ഹാനികരമല്ല. എന്നാൽ ഓരോ സ്ത്രീയിലും bleeding pattern വ്യത്യസ്തമായിരിക്കാം. അതിനാൽ ഇംപ്ലാന്റ് തിരഞ്ഞെടുക്കുന്നതിന് മുമ്പുതന്നെ ഇതിനെക്കുറിച്ച് ഡോക്ടറുമായി സംസാരിക്കുന്നത് നല്ലതാണ്.

മറ്റു പാർശ്വഫലങ്ങൾ ഉണ്ടാകുമോ?

എല്ലാവർക്കും പാർശ്വഫലങ്ങൾ ഉണ്ടാകണമെന്നില്ല.

ചില സ്ത്രീകളിൽ തലവേദന, സ്തനങ്ങളിൽ അസ്വസ്ഥത, acne, mood changes തുടങ്ങിയ പ്രശ്നങ്ങൾ അനുഭവപ്പെടാം. ഇംപ്ലാന്റ് സ്ഥാപിച്ച ഭാഗത്ത് ആദ്യ ദിവസങ്ങളിൽ ചെറിയ വേദനയോ നീർവീക്കമോ bruising-ഓ ഉണ്ടാകാനും സാധ്യതയുണ്ട്.

ഏതെങ്കിലും ലക്ഷണം ബുദ്ധിമുട്ടുണ്ടാക്കുന്നുവെങ്കിൽ ഡോക്ടറുമായി സംസാരിക്കണം.

ആർക്കൊക്കെ ഇത് അനുയോജ്യമാകാം?

അടുത്ത ഏതാനും വർഷത്തേക്ക് ഗർഭധാരണം ഒഴിവാക്കാൻ ആഗ്രഹിക്കുന്നവർ, ദിവസവും ഗർഭനിരോധന ഗുളിക ഓർത്തു കഴിക്കാൻ ബുദ്ധിമുട്ടുള്ളവർ, ദീർഘകാലം പ്രവർത്തിക്കുന്നതും പിന്നീട് ആവശ്യമെങ്കിൽ മാറ്റാവുന്നതുമായ ഒരു ഗർഭനിരോധന മാർഗം ആഗ്രഹിക്കുന്നവർ തുടങ്ങിയവർക്ക് ഇംപ്ലാന്റ് ഒരു നല്ല ഓപ്ഷനായേക്കാം.

എന്നാൽ എല്ലാ സ്ത്രീകൾക്കും ഒരേ ഗർഭനിരോധന മാർഗം അനുയോജ്യമാകണമെന്നില്ല. നിലവിലുള്ള ആരോഗ്യപ്രശ്നങ്ങൾ, ഉപയോഗിക്കുന്ന മരുന്നുകൾ, പ്രസവവുമായി ബന്ധപ്പെട്ട സാഹചര്യങ്ങൾ, വ്യക്തിപരമായ മുൻഗണനകൾ എന്നിവ പരിഗണിച്ചാണ് അനുയോജ്യമായ മാർഗം തിരഞ്ഞെടുക്കേണ്ടത്. ചില മരുന്നുകൾ implant-ന്റെ ഫലപ്രാപ്തിയെ ബാധിക്കാനും സാധ്യതയുണ്ട്.

ഇംപ്ലാന്റ് എടുത്തുമാറ്റിയാൽ പിന്നീട് ഗർഭം ധരിക്കാമോ?

ഇത് സ്ഥിരമായ ഗർഭനിരോധന മാർഗമല്ല.

ആവശ്യമുള്ളപ്പോൾ പരിശീലനം ലഭിച്ച ആരോഗ്യപ്രവർത്തകന്റെ സഹായത്തോടെ ഇംപ്ലാന്റ് നീക്കം ചെയ്യാം. അതിനാൽ ഭാവിയിൽ കുഞ്ഞ് വേണമെന്നുള്ള സ്ത്രീകൾക്കും, തങ്ങൾക്ക് അനുയോജ്യമാണെങ്കിൽ, ഇത് പരിഗണിക്കാവുന്ന ഒരു reversible contraceptive option ആണ്.

ഒരു കാര്യം കൂടി ഓർക്കാം

ഗർഭനിരോധന ഇംപ്ലാന്റ് ഗർഭധാരണം തടയാനാണ്.

ഇത് HIV ഉൾപ്പെടെയുള്ള ലൈംഗികമായി പകരുന്ന അണുബാധകളിൽ (STIs) നിന്ന് സംരക്ഷണം നൽകുന്നില്ല. അത്തരം സംരക്ഷണം ആവശ്യമായ സാഹചര്യങ്ങളിൽ condom പോലുള്ള barrier protection കൂടി ആവശ്യമാണ്.

എനിക്ക് ഇംപ്ലാന്റ് അനുയോജ്യമാണോ?

അതിന് ഒരു പൊതുവായ ഉത്തരം നൽകാൻ കഴിയില്ല.

“ഏറ്റവും നല്ല ഗർഭനിരോധന മാർഗം ഏതാണ്?” എന്നതിനെക്കാൾ,

“എനിക്ക് ഏറ്റവും അനുയോജ്യമായ ഗർഭനിരോധന മാർഗം ഏതാണ്?” എന്നതാണ് ചോദിക്കേണ്ടത്.

നിങ്ങളുടെ പ്രായം, ആരോഗ്യസ്ഥിതി, അടുത്ത ഗർഭധാരണം എപ്പോൾ ആഗ്രഹിക്കുന്നു, മാസമുറയുടെ സ്വഭാവം, ഉപയോഗിക്കുന്ന മരുന്നുകൾ, വ്യക്തിപരമായ മുൻഗണനകൾ എന്നിവയെല്ലാം മനസ്സിലാക്കിയ ശേഷമാണ് ശരിയായ മാർഗം തിരഞ്ഞെടുക്കേണ്ടത്.

നിങ്ങൾക്ക് ഗർഭനിരോധന ഇംപ്ലാന്റിനെക്കുറിച്ചോ മറ്റ് ഗർഭനിരോധന മാർഗങ്ങളെക്കുറിച്ചോ സംശയങ്ങളുണ്ടെങ്കിൽ, വ്യക്തിഗത Contraceptive Counselling-നായി ഗൈനക്കോളജിസ്റ്റുമായി സംസാരിക്കാം.

ഡോ. ജിത വിനീത്